ഗെയിമിംഗ് അഡിക്ഷൻ

നിങ്ങളുടെ മക്കൾ എപ്പൊഴും വീഡിയോ ഗെയിം കളിച്ചു ഇരിക്കുക ആണോ? 

അവരുടെ ഇൗ സ്വഭാവം എങ്ങിനെ തിരുത്തും എന്ന് ആലോചിച്ച് വിഷമിച്ച് ഇരിക്കുക ആണോ നിങ്ങള്?

ഇത് ശ്രദ്ധിക്കുക

പൊതുവേ നാം മലയാളികൾ മക്കളെ വിരട്ടി നന്നാക്കാൻ ആണ് ശീലിച്ചിരിക്കുന്നത്. ഫോൺ പിടിച്ചു വാങ്ങുക, ഇന്റർനെറ്റ് ഓഫ് ചെയ്തു വയ്ക്കുക അധ്യാപകരോട് മക്കളുടെ കുറ്റം പറയുക എന്നീ കലാപരിപാടികൾ ആണല്ലോ നമ്മുടെ സ്ഥിരം നമ്പറുകൾ . ഇൗ തരം വിദ്യകൾ ഒന്നും അത്ര ഫലപ്രദം അല്ല എന്ന് നമ്മളിൽ മിക്കരും ഇപ്പൊ മനസിലാക്കി കാണും. ഞാൻ പറയാൻ പോകുന്ന 5 കാര്യങ്ങൾ നിങ്ങൾക് ശ്രമിച്ച് നോക്കാം.

1.  മക്കളോടൊപ്പം കുട്ടി ആവുക 

നിങ്ങളുടെ കുട്ടിക്ക് കൊടുക്കാൻ പറ്റിയ ഏറ്റവും നല്ല സമ്മാനം എന്താണ് എന്ന് അറിയാമോ? നിങ്ങളുടെ സമയം. ദിവസത്തിൽ കുറച്ച് സമയം അവരുടെ കൂടെ ഗെയിം കളിച്ചു നോക്കു. (ഞെട്ടരുത്)

ഇത് കുട്ടിയുടെ മനസ്സിൽ നിങ്ങളോട് കൂടുതൽ അടുപ്പം തോന്നിക്കും. നിങ്ങള് അവരുടെ ലോകത്തേക്ക് ഇറങ്ങി ചെന്നാൽ അവരും ഹാപ്പി ആകുന്നത് കാണാം.

2. ഓൺലൈൻ ആയിരിക്കുന്ന സമയം രേഖപ്പെടുത്തുക

പൊതുവേ കുട്ടികൾ പറയുന്ന ഒഴിവുകഴിവു ആണ്..ഞാൻ വളരെ കുറച്ച് നേരം മാത്രമേ ഗെയിം കളിച്ചു കളയുന്നുള്ളു..വെറുതെ അച്ഛനും അമ്മയും വഴക്ക് ആണ് എന്ന്.. നിങ്ങളുടെ മക്കളോട് ഒരു ആഴ്ച  ഗെയിം കളിക്കുന്ന അല്ലെങ്കിൽ ഫോൺ നോക്കിയിരിക്കുന്ന സമയം രേഖപ്പെടുത്താൻ പറയൂ. ഇത് അച്ഛനും അമ്മയും ചെയ്താലും മതി. 

ആഴ്ചയുടെ അവസാനം മക്കൾ ഇൗ കണക്ക് ഒന്ന് കാണട്ടെ.. ഇത്തവണ അവരുടെ ഞെട്ടൽ കാണാം ( പുറത്ത് കാണിക്കില്ല..സൂക്ഷിച്ച് നോക്കണം).

ഇങ്ങനെ ചെയ്യുന്നതിന്റെ പ്രധാന ഗുണം പിന്നീട് സമയം കളഞ്ഞോ ഇല്ലയോ എന്ന് സംശയം കാണില്ല... രണ്ടു ഭാഗത്തും.

3.ഒരു നീണ്ട കാല പദ്ധതി തയ്യാറാക്കുക 

കുട്ടികൾക്ക് ഒരു പ്രോജക്ട്  ഏറ്റെടുത്ത് നടത്താൻ ഉള്ള ദീർഘവീക്ഷണം കാണണം എന്നില്ല. അച്ഛനമ്മമാർ മക്കളുടെ കൂടെ ഇരുന്നു ആലോചിച്ച് ഇങ്ങനെ ഉള്ള പദ്ധതികൾ തയ്യാറാക്കാം. തയ്യൽ, പൂന്തോട്ടം തയ്യാറാക്കൽ, സംഗീത ഉപകരണം പഠിക്കൽ, ഏതെങ്കിലും സ്പോർട്സ് ക്ലാസ്സ് തുടങ്ങിയവ ഇതിൽ ഉൾപ്പെടുത്താം. ഇതിൽ നമ്മുക്ക് കുറച്ച് പണ ചിലവ് ഉണ്ട് എന്ന് ഓർമിക്കുക . അതിനു മാനസികമായ ഒരു തയ്യാറെടുപ്പ് നമ്മുടെ ഭാഗത്തും വേണം കേട്ടോ.

4. അകമഴിഞ്ഞ് അഭിനന്ദിക്കണം

നേരത്തെ പറഞ്ഞ കാര്യങ്ങളിൽ ഏതെങ്കിലും നിങ്ങളുടെ മക്കൾ ചെയ്യാൻ തയ്യാറായാൽ അവരെ പ്രോത്സാഹിപ്പിക്കാൻ മറക്കരുത്. അത് എത്ര ചെറിയ കാര്യം ആയാലും. അവര് അത് ചെയ്യുന്നത് നിങ്ങളെ സന്തോഷിപ്പിക്കാൻ ആണ്. ആ സമയത്ത് "ചാക്കോ മാഷ്" ആകരുത്. 

5. ഒരു നേരം എങ്കിലും ഒരുമിച്ചിരുന്ന് ഭക്ഷണം കഴിക്കുക

മാതൃക കാണിക്കുക. ഒരു നേരം എല്ലാവരും ഒന്നിച്ച് ഇരുന്ന് ഭക്ഷണം കഴിക്കുക. ഇൗ നേരം ആരും തന്നെ ഫോൺ ഉപയോഗിക്കാതെ ഇരിക്കുക. കുട്ടിയോട് നല്ല സ്നേഹമായി സംസാരിക്കുക. പലർക്കും ഭക്ഷണ സമയം മക്കളെ നന്നാക്കാൻ ഉള്ള സമയം ആണ്.. അത് പാടില്ല. 

നമ്മുടെ മക്കളെ ഫോണിൽ നിന്നും അടർത്തി മാറ്റിയെടുക്കാൻ അത്ര എളുപ്പം അല്ല. എനിക്കും നിങ്ങൾക്കും... പ്രത്യേകിച്ച് നമ്മുടെ  ഒക്കെ ജോലിത്തിരക്കിനിടയിൽ. പക്ഷേ ഉത്തരവാദിത്വം ഉള്ള ഒരു ഭാവി തലമുറയെ വാർത്തെടുക്കാൻ നമ്മൾക്കും തന്നാലായത് ചെയ്യണ്ടേ??

മുന്നറിയിപ്പ്: ഇൗ ലേഖനം നിങ്ങളുടെ മക്കൾ ആണ് ആദ്യം വായിക്കുന്നത് എങ്കിൽ ഇൗ ടിപ്സ് ഒന്നും എൽക്കില്ല. പിന്നെ നടക്കുന്നതിന് ലേഖിക ഉത്തരവാദി അല്ല..

ശ്രീജ